TGPSC Jobs 2026: ఒకేరోజు 3 భారీ నోటిఫికేషన్లు విడుదల.. త్వరలో మరో 3,800 ఉద్యోగాల భర్తీ…

TGPSC 3 Notifications 2026 Full Details in Telugu :

తెలంగాణ రాష్ట్ర అవతరణ దినోత్సవాన్ని పురస్కరించుకుని తెలంగాణ పబ్లిక్ సర్వీస్ కమిషన్ (TGPSC) అభ్యర్థులకు శుభవార్త అందించింది. ఒకేరోజు మూడు కీలక ఉద్యోగ నోటిఫికేషన్లను విడుదల చేస్తున్నట్లు TGPSC ఛైర్మన్ వెల్లడించారు.

ఈ నోటిఫికేషన్లలో తెలంగాణ పొల్యూషన్ కంట్రోల్ బోర్డులో 19 అసిస్టెంట్ ఎన్విరాన్‌మెంటల్ ఇంజనీర్ పోస్టులు, రోడ్లు & భవనాల శాఖలో 222 అసిస్టెంట్ ఎగ్జిక్యూటివ్ ఇంజనీర్ (సివిల్) పోస్టులు, అలాగే 49 అసిస్టెంట్ ఎగ్జిక్యూటివ్ ఇంజనీర్ (ఎలక్ట్రికల్) పోస్టులు భర్తీ చేయనున్నారు.

ప్రతి నెల మూడు నోటిఫికేషన్లు :

ఇకపై ప్రతి నెల కనీసం మూడు ఉద్యోగ నోటిఫికేషన్లు విడుదల చేసేలా కార్యాచరణ రూపొందించినట్లు TGPSC తెలిపింది. ప్రస్తుతం దాదాపు 3,800 ఖాళీల భర్తీకి ఆర్థిక శాఖ నుంచి అనుమతులు లభించాయని అధికారులు వెల్లడించారు.

1,393 ఫారెస్ట్ బీట్ ఆఫీసర్ పోస్టులు :

త్వరలో విడుదల కానున్న నోటిఫికేషన్లలో 1,393 ఫారెస్ట్ బీట్ ఆఫీసర్ (FBO) పోస్టులు కూడా ఉన్నాయని పేర్కొన్నారు. ఈ పోస్టులకు ఇంటర్మీడియట్ ఉత్తీర్ణత అర్హతగా ఉండే అవకాశం ఉంది.

కంప్యూటర్ బేస్డ్ టెస్ట్ విధానం ;

భవిష్యత్ నియామకాల్లో పరీక్షలను పూర్తిగా కంప్యూటర్ బేస్డ్ టెస్ట్ (CBT) విధానంలో నిర్వహించనున్నట్లు TGPSC స్పష్టం చేసింది. పరీక్షల నిర్వహణలో పారదర్శకత, వేగవంతమైన ఫలితాల ప్రకటన కోసం ఆధునిక సాంకేతికతను వినియోగించనున్నట్లు తెలిపారు.

త్వరితగతిన నియామక ప్రక్రియ :

ఒకే దశ పరీక్షతో జరిగే నియామకాలను 3 నుంచి 6 నెలల్లోపు పూర్తి చేయాలని లక్ష్యంగా పెట్టుకున్నట్లు కమిషన్ పేర్కొంది. ప్రిలిమ్స్, మెయిన్స్ వంటి బహుళ దశల పరీక్షలు ఉన్న నియామకాలను కూడా 6 నుంచి 9 నెలల్లో, గరిష్టంగా 12 నెలల్లోపు పూర్తి చేసేలా ప్రత్యేక ప్రణాళిక రూపొందించినట్లు వెల్లడించింది.

తెలంగాణలో ఉద్యోగాల కోసం ఎదురుచూస్తున్న నిరుద్యోగ యువతకు TGPSC నుంచి వరుస నోటిఫికేషన్లు విడుదల కావడం పెద్ద ఊరటనిచ్చే అంశంగా మారింది.

TGPSC Official Website Click Here