AP School Summer Holidays 2026: విద్యార్థులకు గుడ్ న్యూస్ – వేసవి సెలవులు ప్రకటించిన ప్రభుత్వం:

AP School Summer Holidays 2026:

ఆంధ్రప్రదేశ్ రాష్ట్రంలోని విద్యార్థులకు శుభవార్త. రాష్ట్రవ్యాప్తంగా ఉన్న పాఠశాలలకు త్వరలోనే వేసవి సెలవులు ప్రారంభం కానున్నాయి. ఈ సంవత్సరం విద్యార్థులకు దాదాపు 48 రోజులపాటు విశ్రాంతి లభించనుంది.

రాష్ట్ర పాఠశాల విద్యాశాఖ ప్రకటించిన అకాడమిక్ క్యాలెండర్ ప్రకారం, ఏప్రిల్ 24, 2026 నుంచి జూన్ 11, 2026 వరకు వేసవి సెలవులు కొనసాగుతాయి. జూన్ 12, 2026న పాఠశాలలు తిరిగి ప్రారంభం కానున్నాయి. ప్రతి సంవత్సరం లాగే ఈసారి కూడా ఎండ తీవ్రతను దృష్టిలో ఉంచుకుని ఈ నిర్ణయం తీసుకున్నారు.

భద్రతపై ప్రత్యేక సూచనలు:

ఈ వేసవి కాలంలో ఎండ తీవ్రత అధికంగా ఉండే అవకాశం ఉండటంతో పాటు, చెరువులు, కాలువలు, నదుల వద్ద ప్రమాదాలు జరగకుండా ఉండేందుకు ప్రభుత్వం కీలక సూచనలు జారీ చేసింది. జిల్లా విద్యాధికారులకు విద్యార్థుల భద్రతపై అవగాహన కార్యక్రమాలు నిర్వహించాలని ఆదేశించింది.

ప్రభుత్వ, ఎయిడెడ్ మరియు ప్రైవేట్ పాఠశాలల్లో విద్యా సంవత్సరం ముగిసే ముందు విద్యార్థులకు భద్రతా చర్యలపై ప్రత్యేక అవగాహన కల్పించాలని సూచించారు.

విద్యార్థులకు ముఖ్య సూచనలు:

1. పెద్దల పర్యవేక్షణ లేకుండా చెరువులు, కాలువలు, నదులు, బావుల వద్దకు వెళ్లకూడదు.

2. మధ్యాహ్నం 12 గంటల నుంచి సాయంత్రం 4 గంటల వరకు బయటకు వెళ్లడం నివారించాలి.

3. ఎండ తీవ్రత కారణంగా తరచుగా నీళ్లు తాగాలి.

4. అవసరం లేకుండా బయట తిరగకుండా జాగ్రత్తలు తీసుకోవాలి.

5. అలాగే పాఠశాలల నోటీస్ బోర్డులపై భద్రతా సూచనలు ప్రదర్శించాలని విద్యాశాఖ ఆదేశాలు జారీ చేసింది.

ఇంటర్ తరగతుల ప్రారంభం :

1. ఇంటర్మీడియట్ ఫస్ట్ మరియు సెకండ్ ఇయర్ తరగతులు జూన్ 1, 2026 నుంచి ప్రారంభం కానున్నాయి.

2. విద్యార్థుల ఆరోగ్యం, భద్రత దృష్ట్యా ఈ వేసవి సెలవులను సద్వినియోగం చేసుకోవాలని, ఎండల నుంచి రక్షణ పొందేలా జాగ్రత్తలు తీసుకోవాలని పాఠశాల విద్యాశాఖ సూచించింది.